Holong Na Humbani Naibata

"Holong dunia on buenan do ai marpangkaut (holung atap helung). Torihon songon na holong uhurni marhitei hatani atap pambahenanni, hape dong do tinembakni, dong tinatapni.

Pindoonta na hubani Naibata, ase isuan hu banta holong na humbani Naibata, ase tubuh janah lambin banggal holong ai ibagas uhurta, gabe goluhta, gabe hadirionta." ~Pdt J Wismar Saragih, Tadah ni Tonduyta, 8 Februari

Sai na adong do dalan lang marsisisean halani marasa lang butuh. Boi do halani pangkawah, panisei nahurang, parsahap nalang martapis.

Tapi anggo porlu ma, mangkorhon idou, paruntungan boi homa lang itanda ila, ihata pe tong jungil ni iparjungil. Ase boi do malum borit ni uhur ibahen kapontingan, songon percaturan dunia, rup mangkatai, riap mangapiti, dob ai marporang.

Boi do toppu marsidearan halani dong siparayakon, sipata lupa nadong do hape parsoalan tapi halani porlu ni uhur, saor haila pe boido suruk-suruk naso niarap.

Si Tolkas marturi-turian mangidah namasa bani pingkiran ni, mambahen si Maor sihol marsampang lanjar ihatahon:

Maor: Baru pe hualami pas songon sarita ni ham ai, porini tarjadi ilambungta atap hita mangalami sandiri aima dunia nasasintong ni. I dunia nalegan lang masa ai.

Ringgas: Sonai ma pas na hualami, calon simatua ni borunta siganjangan, lobih ma 20 tahun hanami lang marsidearan alo kawan. Sanggah rup garama, sarupa sekkian nami hape sada pelang hanami dapotan. Rimas ni uhur mardalan torus, baru pe dung adong parsahapan ni borunta on pakon calon hela marsisisean. Maila do nian ibagas uhur, tapi marsiponopkon uhur na be.

Maor: Anggo sonai misal ni tarmasuk ma ai uhur haut ? Sipata lang tarsahapkon tene, anggo dong kepentingan najungkat jadi bujur, paima dapot naibagas uhur. Sonai ma pas hanami ijabu pakon boru nasiam. Domma garama dua halak on, lalap lape taridah tanda-tanda laho pajabu parumaen. Adong calon na tikki ai, lang pas ibagas uhur nami, ai gatinan manonggor hahurangan daripada halobihan ni.

Tolkas: Namarsanina ma ai pakon uhur haut, anggo dear honsi ibani, torus do iroro songon jukkat ni panoro. Anggo lang dalanni paruntungan bani, boi do pahula lang itangar, hona hossi mata ni kail ni, lalap ma iirik-irik, tapi anggo dalan ni utang lang pala ipaganjang.

Maor: Sihol ma nian dapotan parholong nasintong, songon umpama ni halak Indonesia; *hujan tak lapuk, kemaraupun tak lekang.* Lang mangidah jumbak, holong ai dos ihabungan dos ibuntu-buntu, mardalan bani berean ni. Songon parholong na hun bani Naibata, haganup do dapotan, domu hubani haporluan ni be. Marlajar ma hita, panorang ni domma manjalo, waktu ni ma mambere.

Ringgas: Dong do umpama ni Simalungun; *"dilah mangalai hu ngadol"* *mangayob do hansa ibotoh, pas marbagi ipapudi tangan ni.* *Anggo dong haporluan ni ipahita-hita,* *anggo bani utang, nasiam ma hujin*

Maor: *Haru do mambahen nadear honsi, dong do tong hurang ni. Nahurang ai bagian ni hajolmaon do ai, lobih ni ai nahumbani Naibata.*

*Anggo sonai ipadohor hita ma hubani Naibata mangorui hahurangan, manambahi halobihan.* *Amen*

Salam sehat, totap semangat.

(St Riden Sipayung)